بوست طويل لو مافيش مزاج تقراه افكسله
من شويه وقت عدو كنت بتمشى فى جنينه لفت نظرى المنظر اللى فى الصوره ده ..كرسى حديد وباين عليه انه قديم حاضنااه جزع شجره لدرجه ان الكرسى الحديد طلع من الارض اللى محفور فيها ورجع لورا لو عملت زوم فى الصوره هتشوف ازاى الشجره حركت الكرسى الحديد اللى ثابت فى الارض …. وقتها فكرت مين فيهم طلع اقوى واصلب وكان المشهد اللى قدامى بيجاوبنى …. فكرت … وسالت نفسى ازاى الشجره الخشب طوعت الكرسى الحديد! … وكانت اول اجابه تيجى فى دماغى ان الحياه غلبت الجماد وقويت عليه …. طبقت الكلام ده على نقط الميه اللى بتحفر فى الصخره ولقيت برضو نفس الاسئله ونفس الاجوبه ..وقتها وصلت لحاجه مهمه اوى احيانا بنقابل ناس جامده فى مشاعرها قاسيه زى الحديد والصخره الناس دول ممكن يكونوا اخ، اب ام ،زوج ،زوجه، اخت او ابناء او غيرهم … القسوه دى تتعالج بحاجات كتيره بس فيه حاجه واحده بس ناس كتير وانا اولهم مش مجرباها وهى اننا عمرنا ما جربنا نبطل نفكر فى قسوتهم بينما ان كل اللى علينا اننا نسيب الحياه تجرى فى دمنا … بطلنا نغنى ونحب ونستمتع بالشمس وبالبحر بالسمك
بيعوم فى الميه بطلنا نغمض عنيناو نستمتع بريحه الورد بطلنا نجمع قواقع من الشط او نشوف العصفور مش واخدين بالنا ان التفاصيل دى هتخلق جوانا حياااااه هتخلق حب وقوه تحمل هتخلق متعه تخش جوانا وتفيض على القساوه زى ما الشجره دى عملت بالظبط مع الكرسى الحديد …. جايز تقولولى انتى ساذجه وطيبه وهبله بس تخيلوا معايا لو كانوا اتنين واقفين مكانى من 30سنه فاتت مثلا وقت لما الشجره دى كانت برعم صغير فى الارض وجنبها الكرسى الحديد الثابت ده ياترى لو حد فيهم كان قال للتانى الشجره دى هتكبر وهتحضن الكرسى الحديد وتحركه من مكانه يا ترى كان هيصدق .؟ اكيد لا وانا اكيد ماكنتش هصدق غير لما شوفت بعينى. … … انا مؤمنه جدا بفكره ان المحبه اقوى من اى قسوه مهما كانت… بس مفتاح الانتصار هو الصبر وطول الاناه والاصرار على امتصاص طاقه الحياه من قلب الحياه علشان نعيش الحياه …
ساره_عزت#
