مصر

الثورة الحقيقيه مش نزول فى الشارع وشعارات ولافتات عيش حريه عداله اجتماعيه

الشعب لازم يثور بصمته!!!

مصر هى اخناتون وكلوبترا الملك مينا… محمد على..مصر هى الفلاح البسيط اللى بيزرع ارضه… مصر هى كل مهندس ودكتور وصيدلى ونجار وسباك وبواب بيأدى دوره المؤمن بيه بامانه …
مصر هى كل ام عارفه دورها ومذاكراه كويس اوى وعارفه ومتاكده انها احتمال كبير اوى تكون بتربى دلوقتى رئيس جهوريه مصر او عالم او فنان …. اللى هيبقى هديه من ايديها لبلدها بعد بالكتير 30 سنه …. مصر هى عمر الشريف..ام كلثوم .. فاتن حمامه…يوسف شاهين…. نجيب محفوظ .. توفيق الحكيم… احمد زويل .. مجدى يعقوب ..
مصر عمرها ما هتتشرف وسط العالم غير باهلها …… مصر مش البلطجيه والجماعات المتطرفه والتخلف والفقر والفساد
لو حبيت تهدم شعب نسيه ماضيه.قلل من قيمه دور الام …. نسيه شرفه … وخليه باصص على كل ما هو مسخ علشان ثقته بنفسه تقل ويفقد هويته . بالتقليد الاعمى وعقدة الخواجة… مصر كيان لازم نعوده يتشرف بينا …. قدام العالم …
مصر مش هيعدلها اى رئيس دوله لان عمر ما هيجى رئيس دوله من شعب مش مؤمن بنفسه وفاقد الامل …
لو حقيقى عايزين نغير نبدا من بيوتنا والام تؤمن انها قوه جباره ممكن تبنى البلد وممكن تهد البلد لان الاطفال هما المستقبل وهى حاضنه المستقبل بين ايديها …. لان البيت هو الخليه اللى بتكون جسد الدوله اوعى تستهتر بقوة اسرتك وقوتك انت سخصيا … هتلر فرد واحد فى المجتمع وعمل مذابح ومجدى يعقوب فرد واحد وغير مصير ناس كتير من ابناء هذا العالم …. لازم نصدق اننا قوه جباره قابله للانفجار فى اى لحظه اما بالتخريب او بالتعمير ….هى دى الثوره الحقيقيه والمضمونه العواقب من وجهة نظرى

سارة_عزت#